Муса Җәлил турнирында елның иң көчле көрәшчеләрен һәм тренерларын бүләкләделәр
Командалар арасында Әлмәт районы командасы җиңде.
(Казан, 18 март, «Татар-информ», Энҗе Габдуллина). Муса Җәлил турнирының ачылыш тантанасында «Ел көрәшчесе», «Ел хөкемдары», «Ел тренеры», «Ел журналисты» һәм «Ел командасы» номинациясендә җиңүчеләрне бүләкләделәр.
Узган елның иң яхшы көрәшчеләре булып Теләче командасыннан Ренас Кәлимуллин, Әлмәттән Радик Сәлахов һәм Кукмара командасыннан Раил Сәлахетдинов танылды.
Иң яхшы тренерлар номинациясендә ир-егетләр белән шөгыльләнгән Ильяс Билалов, Җәүдәт Хөсәенов, Илнур Хәйбуллин, яшь егетләрне әзерләүче Руслан Нургалиев, Таһир Әхкәмов һәм Айрат Миңнегалиев бүләкләнде.
Иң яхшы хөкемдарлар исеменә Айдар Әхмәтҗанов, Динар Зиннәтуллин һәм Илһам Волков лаек булды.
Ел барышында узган ярышларда уңышлы чыгыш ясаган Әлмәт, Кукмара, Чаллы, Балтач, Арча районнары, Казанның Авиатөзелеш һәм Яңа Савин районнары да бүләкләнде.
Ачылыш тантанасында көрәш ярышларын актив рәвештә яктырткан журналистларны да бүләкләделәр. Теләчедән Фәнил Нигъмәтҗанов, Балтачтан Нурзадә Сәмигуллина, Әлмттән Рәмилә Хәмидуллина, Түбән Камадан Виктор Шадрин, шулай ук «Ватаным Татарстан» газетасыннан Илнар Хөснуллин, «Шәһри Казан»нан Радик Сабиров, «Татарстан яшьләре»нән Атлас Гафиятов, «Татар-информ»нан Энҗе Габдуллина «Ел журналисты» исеменә лаек булды.
