Әмир Кусторица «Алтын Минбәр» кинофестивале жюриен җитәкләргә ризалык биргән

(Казан, 17 июнь, «Татар-информ», Маһирә Миңнуллина). Быелының 10-17 сентябрьдә Казанда үтәчәк «Алтын Минбәр» П Халыкара мөселман киносы фестивале жюрие рәисе билгеле булган. Ул — танылган Югославия режиссеры, Канн кинофестивале лауреаты Әмир Кусторица. Россия кино сөючеләренә ул «Тормыш ул – могҗиза» (Zivot je cudo), «Сан-Пьер утравы тол хатыны» (La Veuve De Saint-Pierre), «Әйбәт карак» (The Good Thief), «Андеграунд» (Underground) фильмнары аша таныш.

Фестиваль, билгеле булганча, уен, документаль һәм анимацион фильмнар номинацияләрендә үтәчәк. Конкурста АКШ, Франция, Голландия, Мексика, Индонезия, Майзия, Һиндстан, Иран һ.б. илләрнең фильмнары катнашачак. Бүгенге көндә конкурсны оештыручылар исеменә 30 картина килеп ирешкән.