Хәмдүнә Тимергалиевага вафатыннан соң Башкортстанның халык артисты исеме тапшырылды
Бүген Казанда Тукай филармониясе залында Хәмдүнә Тимергалиева белән хушлашалар.
(Казан, 15 сентябрь, «Татар-информ»). Бүген Казанда Тукай филармониясе залында Татарстанның халык артисты Хәмдүнә Тимергалиевага вафатыннан соң Башкортстанның халык артисты исеме бирелде.
«Хәмдүнә апа Башкортстан Республикасы Борай районында туып, 44 ел Татарстанда яши. Дөньяда яшәгән татар һәм башкорт халкы арасында үзенең җыры, моңы белән танылды. Аны Башкортстан халкы да ярата, чөнки аның гастрольләре гел булып торды. Бик авыр кайгы, югалту бу. Февральдә РБ җитәкчесе аңа Башкортстанның халык артисты исемен бирү указына кул куйган иде. Әмма коронавирус сәбәпле, әлеге исемне аңа бирә алмадык, ләкин бүген әлеге зур лаеклы бүләкне аңа тапшырабыз», — диде Башкортстан Республикасы мәдәният министрының беренче урынбасары Рәнис Алтынбаев.