Тинчурин театрының «Өч аршын җир» спектакле Тукай премиясенә тәкъдим ителә
Бүген Тукай премиясенә дәгъва итүчеләрдән гаризалар кабул ителүнең соңгы көне.
(Казан, 15 февраль, “Татар-информ”, Рузилә Мөхәммәтова). Тинчурин театры үзенең Аяз Гыйләҗев әсәре буенча куелган спектаклен Тукай премиясенә тәкъдим иткән. Бу хакта “Татар-информ”га үз чыганаклары аша билгеле булды.
Тинчурин театрында Аяз Гыйләҗевның “Өч аршын җир” спектаклен режиссер Илгиз Зәйниев чыгарды. Композитор – Эльмир Низамов. Спектакльнең премьерасы 2019 елның 29 ноябрендә булды.
Театр Тукай премиясенә спектакльдә төп геройларны уйнаган актерларын тәкъдим иткән. Болар – ике составта өлкән Мирвәли белән Шәмсегаянны уйнаган артистлар.
Мирвәли ролендә – Ренат Шәмсетдинов белән Ирек Хафизовлар иде. Шәмсегаян – Зөлфия Вәлиева белән Гөлчәчәк Хафизова.
Бүген Тукай премиясенә дәгъва итүчеләрдән гаризалар кабул ителүнең соңгы көне. Тукай премиясенә кандидатлар исемлеген комиссия формалаштыра һәм фикер алышу өчен халыкка тәкъдим ителә.