Алабугада кытай рәссамының күргәзмәсе уза

(Алабуга, 14 декабрь, “Татар-информ”, Гөлшат Солтанова). Алабуга шәһәре күргәзмәләр залында кытай рәссамы Ван Хуа Фанның “Сокландыргыч Шәрык” дип исемләнгән күргәзмәсе уза. Күргәзмә Алабуга музей-тыюлыгы тарафыннан оештырылган.

“1000 еллыктан соң шәһәрне бик тә күрәсем килде. Алабугада күп үзгәрешләр булуы хакында ишеткәч тә, миндә зур кызыксыну хисе туды һәм кичекмәстән сезгә килергә булдым. Өстәвенә, сезгә күрсәтер әйберләрем дә бар”, - дип ассызыклады Ван Хуа Фан.

Рәссам күргәзмәдә үз эшләрен генә түгел, ә шәхси коллекциясен дә тәкъдим итте. Фил сөягенә уеп ясалган рәсем, кытай кулчатырлары, X йөзгә караган кимоно һәм форфор – болар тәкъдим ителгән экспонатларның кайберләре генә. Шунысы кызык, зал үзе дә күргәзмә өчен кытай традицияләре буенча бизәлгән, биредәге бар нәрсәдә инь һәм янь башлангычлары урын алган.

“Сокландыргыч Шәрык” күргәзмәсе 30 декабрьгә кадәр эшләячәк.