Язучылар берлеге рәисе Данил Салихов әсәре Берлек үткәргән әдәби конкурста җиңде

Язучылар берлеге һәм Авыл хуҗалыгы министрлыгы авыл темасына багышлап үткәргән әдәби конкурска йомгак ясалды.

(Казан, 14 август, «Татар-информ», Рузилә Мөхәммәтова). ТР Язучылар берлеге һәм ТР Авыл хуҗалыгы министрлыгы бергә үткәргән әдәби конкурска йомгак ясалды. Җиңүчеләр исемлеге Язучылар берлегенең рәсми сайтына урнаштырылган.

Авыл хуҗалыгы һәм азык-төлек министрлыгы белән Язучылар берлеге бүгенге авыл тормышын, авыл хуҗалыгы һәм эшкәртү сәнәгате хезмәтчәннәре эшчәнлеген, җир кешесенең рухи-әхлакый дөньясын һәм авылда бара торган иҗтимагый-социаль процессларны яктыртуга багышланган чәчмә әсәрләргә конкурс игълан иткән иде.

Әдәби конкурс өч номинация буенча үткәрелде. Җиңүчеләргә «Роман, повесть» номинациясендә I урынга — 150 мең, II урынга — 100 мең, III урынга 50 мең сум акчалата бүләкләр каралган. «Пьеса» номинациясендә премия — 100 мең, 70 мең һәм 30 мең сум күләмендә билгеләнгән. «Хикәя» номинациясендә I урын — 50 мең, II урын — 30 мең, III урын — 20 мең сум.

Бәйгедә Татарстан Язучылар берлеге әгъзасы булмаган, авыл җирлегендә яшәп иҗат иткән каләм ияләре дә катнаша алуы билгеләп үтелгән иде.


Хикәя номинациясе:

I урын — «Гарасаттан соң», Фатыйма Гыйльметдинова (Башкортстан, Борай районы, Искебикмәт авылы);

II урын — «Капка өйләдән соң ачыла», Рамил Ханнанов (Казан);

III урын — «Миңа бер нәрсә кирәкми», Фәнзәлия Бәдертдинова (Башкортстан, Борай районы, Борай авылы).


Драма номинациясе:

I урын — «Язмыш туе», Данил Салихов (Казан);

II урын — «Кайтаваз». Рәдиф Сәгъди (Казан);

III урын — «Алтын нигезле авыл», Радик Нурлыгаянов (Уфа).


Роман, повесть номинациясе:

II урын — «Һәркемгә бер кояш», Айгөл Әхмәтгалиева (Чаллы);

II урын — «Сагыну», Рифат Корбанов Җамалетдин улы (Казан);

III урын — «Җир турында җыр», Марат Кәбиров (Казан) һәм «Каштан күккә төбәлгән», Фирүзә Җамалетдинова (Казан).