Быел Казанда Нуриев фестивале офлайн режимда гына узачак
Чара 17-26 декабрьдә Муса Җәлил исемендәге Татар дәүләт академия опера һәм балет театры сәхнәсендә була.
(Казан, 10 ноябрь, «Татар-информ», Марат Ишкильдин). Рудольф Нуриев исемендәге XXXIII Халыкара классик балет фестивале 17-26 декабрьдә Казанда бары тик офлайн режимында һәм онлайн-трансляцияләрдән башка гына узачак. Бу хакта «Татар-информ» агентлыгына ТР Мәдәният министрлыгыннан хәбәр иттеләр.
«Рудольф Нуриев исемендәге XXXIII Халыкара классик балет фестивале 2020 елның 17-26 декабрендә Муса Җәлил исемендәге Татар дәүләт академия опера һәм балет театры сәхнәсендә үтәчәк. Онлайн-трансляцияләр булмаячак», - дип искәрттеләр министрлыкта.
Фестиваль программасында сигез спектакль бар, аларның икесен чакырылган коллективлар - Кремль театры һәм Борис Эйфман балет театры тәкъдим итәчәк.
- 17 декабрь — «Баядерка».
- 19 һәм 20 декабрьдә Кремль театры «Руслан һәм Людмила» спектаклен тәкъдим итәчәк.
- 21 декабрь — «Шүрәле».
- 22 декабрь — «Аккош күле».
- 23 декабрь — «Дон Кихот».
- 25 һәм 26 декабрьдә Борис Эйфман балет театры «Анна Каренина» спектаклен күрсәтәчәк.
«Татар-информ» агентлыгы Covid-19 пандемиясе аркасында Нуриев фестивалендә РФ театрлары солистларына басым ясаячаклары хакында хәбәр иткән иде.