Тинчурин театры яңа сезонын “Карурман” фэнтези әсәре белән ача

Театрның яңа сезоны 20 августта ачыла.

(Казан, 10 август, “Татар-информ”, Рузилә Мөхәммәтова). Тинчурин театры 87нче театраль сезонын “Карурман” спектакленең премьерасы белән ача. Бу хакта театрның матбугат үзәге хәбәр итә.

Тинчурин театрында яңа сезон карантин алдыннан чыгып өлгергән соңгы премьера белән 20 августта ачыла. Спектакль 18:30 сәгатьтә башлана.

“Карурман” фэнтези спектакленең режиссеры – Резеда Гарипова. Пьеса авторлары – Луиза Янсуар белән Резеда Гарипова.

“Барлык саклану чаралары да күрелә. Тамашачылар маска һәм перчаткалар белән тәэмин ителәчәк”, - дип хәбәр ителә.

Тинчурин театры Татарстан театрларыннан иң беренче булып карантиннан соң спектакль күрсәтә башлады. Моның өчен театр ишегалдында ачык сәхнә төзеде. Театр спектакльләрен Роспотребнодзор таләпләре буенча 50 кеше карый ала.

Ачык һавада спектакльләр театр сезоны ачылгач та эшләвен дәвам итәчәк.