Азнакайда Санкт-Петербург рәссамының картиналар күргәзмәсе ачылды
Картиналарда аның татар мәдәниятенә, халык тарихына һәм аның борынгы гореф-гадәтләренә карата үзенчәлекле мәхәббәте дә чагыла.
(Азнакай, 10 апрель, «Татар-информ», «Маяк», Лиза Нурлыева). Азнакай төбәкне өйрәнү музеенда Россия һәм Татарстан рәссамнары берлеге әгъзасы Илдус Вахитовның картиналарыннан шәхси күргәзмәсе ачылды.
«Санкт-Петербург рәссамы узенең иҗатында берничә теманы яктырта, аның иң яраткан жанры — пейзаж. Флотта хезмәт иткәнгәдер, үзе сәяхәт иткән диңгезләрне чынбарлыгы белән күрсәтә. Татар мәдәниятенә, халык тарихына һәм аның борынгы гореф — гадәтләренә карата үзенчәлекле мәхәббәте дә чагыла. Петербургта яшәү дәверендә борынгы шәһәрнең һәр күзәнәген оста итеп яктырта», — дип хәбәр итә безгә музей экскурсоводы Гөлфия Мостафина.
Илдус Вахитов 1956 елда Уралда, Свердловск шәһәрендә туган. Мәктәптә укыган елларында ук рәсем ясарга ярата, студиягә йөри. Туган шәһәрендә сәнгать — профессиональ училищесында укый, шулай ук югары белем алуга ирешә.
«Тормыш көзгесе» картиналар күргәзмәсе 31 майга кадәр эшлиячәк.