"Татар-информ" "Татарстан" радиосының 90 еллык юбилеен онлайн күрсәтә

Моннан нәкъ 90 ел элек бүгенге К.Тинчурин исемендәге театр бинасында татар радиосы сөйли башлаган.

(Казан, 7 ноябрь, “Татар-информ”, Мөршидә Кыямова). Бүген 13:00 сәгатьтә К.Тинчурин исемендәге татар дәүләт драма һәм комедия театрында "Татарстан" радиосының 90 еллыгына багышланган тантана оештырылачак. Юбилейга багышланган бәйрәм “Татар-информ” мәгълүмат агентлыгыннан онлайн күрсәтеләчәк.

1927 елның 7 ноябрендә 12:00 сәгатьтә тәүге мәртәбә: “Тыңлагыз, тыңлагыз! Казан сөйли!” - авазы яңгыратыла. Бу сүзләрне беренче татар дикторы Гадел Кутуй әйтә. “Татарстан” радиосында 1927 елның 7 ноябреннән алып 50дән артык татар һәм рус дикторлары, композитор һәм язучылар, журналистлар эшләгән.

"Татарстан" радиосының юбилеена багышланган бәйрәмдә радиода төрле елларда хезмәт куйган кешеләр, радио тыңлаучылар, радио ветераннары һ.б катнашачак. Юбилей бәйрәме тарихи истәлекләр, котлаулар һәм җырлар белән үрелеп барачак.