Матди булмаган мәдәни мирас исемлеген дәрәҗәле экспертлар билгелиячәк

(Казан, 7 июнь, “Татар-информ”, Лилия Локманова). Татарстанның матди булмаган мәдәни мирасы исемлегенә нәрсәләр керәчәген экспертлар советы билгелиячәк. Бу хакта бүген Татарстан Дәүләт Советында уздырылган матбугат конференциясендә республиканың мәдәният министры урынбасары Гүзәл Шәрипова хәбәр итте.

“Экспертиза ясау өчен дәрәҗәле белгечләр җәлеп ителәчәк. Хәзерге вакытта без Татарстан Министрлар Кабинетына экспертлар советының исемлеген тәкъдим иттек”, – диде министр урынбасары.

Билгеле булганча, Татарстан Президенты Рөстәм Миңнеханов Татарстан Республикасының “Матди булмаган мәдәни мирасы турында”гы канунын имзалады. Ул 2018 елдан гамәлгә керәчәк. Әлеге канун безнең субъекттагы мәдәни мирасны саклау, үстерү, югалганнарын торгызу максатыннан язылган.