"Татар-информ" агентлыгы "Тамада шоу" фестиваленә багышланган матбугат конференциясе үткәрә

Шоу тамашачылары танылган шәхесләрнең туйлары шаһитлары һәм кунаклары да булачак

(Казан, 7 апрель, «Татар-информ»). Иртәгә, 8 апрельдә, 12.00дә "Татар-информ" агентлыгында "Тамада шоу" бәйрәмнәр өлкәсендә оештыручылар һәм алып баручыларның I фестиваленә багышланган матбугат конференциясе узачак. Фестиваль 14 апрель көнне Г.Тукай исемендәге Татар дәүләт филармониясендә узачак.

"Тамада шоу" - беренче тапкыр сәхнәдә Казанның бәйрәм алып баручылары җыелачак фестиваль. Анда бәйрәм агентлыклары, танылган артистлар һәм татар эстрадасы йолдызлары катнашачак. Сәхнәдә Казанның билгеле модельерларыннан туй күлмәкләре һәм "Джива" ут театры тамашасы тәкъдим ителәчәк.

Оештыручылар иң актив тамашачылар өчен төрле сюрприз һәм бүләкләр дә әзерләгән, моннан тыш, алар ул көнне танылган шәхесләрнең туйлары шаһитлары да булачак.

"Татар-информ" агентлыгында узачак матбугат конференциясендә "Тамада шоу"ның оештыручылары катнаша.