«Нур» татар театры юбилей сезонын Наил Гаетбаев драмасы белән ача

Уфа татар дәүләт театры утызынчы юбилей театраль сезонының беренче премьерасына әзерләнә.

(Казан, 5 август, «Татар-информ»). Уфа татар дәүләт «Нур» театры утызынчы юбилей театраль сезонының беренче премьерасына әзерләнә. Тиздән тамашачылар игътибарына Наил Гаетбаевның «Барысына да чик бар» драмасы тәкъдим ителәчәк.

Театрның матбугат хезмәтенә сылтама белән «Башинформ» хәбәр иткәнчә, хәзер спектакльгә әзерлекнең иң мөһим этапларыннан берсе — әсәрне уку уза. Артистлар материалны үзләштергәч, репетицияләр сәхнәгә күчә.

Спектакльнең режиссеры һәм музыкаль бизәлеше — Башкортстанның атказанган артисты Илдар Вәлиев. Рәссам — Башкортстанның атказанган рәссамы Нурия Габидуллина. Сәнгати тәрҗемәне Гөлнур Госманова башкарган.