Казанда балалар өчен яңа ел экскурсияләре башлана

(Казан, 4 гыйнвар, «Татар-информ»). ТР Милли музее 2011 елның 4–6 гыйнвар көннәрендә башлангыч сыйныф укучылары өчен автобуста һәм җәяүләп экскурсия ясарга тәкъдим итә. Балалар шәһәрнең иң кызыклы һәм төп чыршы бәйрәмнәрендә булачак, Милли музейның “Яңа ел елъязмасы” күргәзмәсен карый алачак.
ТР Милли музее шәһәрнең борынгы урыннарын карарга тәкъдим итә. Балалар Г.Тукай исемендәге әдәбият музеенда Су анасы, Шүрәле, Кисекбаш әкияти персонажлары белән очраша, шулай ук меңьеллык шәһәрнең тарихи урыннары буенча сәфәр кыла һәм ТР Милли музеенда экскурсиядә була ала.
Экскурсиядә катнашучылар Казан тарихы, безнең шәһәрдә булган XVIII гасыр ахыры һәм XIX башының танылган шагыйрьләре Г.Р.Державин, Е.А.Боратынский һәм А.С.Пушкинның тормыш һәм иҗат юллары белән танышачак.