Ютазы районы Акбаш авылында Орчык бәйрәме уздырылды

(Ютазы, 3 ноябрь, "Татар-информ", "Ютазы таңы"). Ютазы районы Акбаш мәдәният йорты хезмәткәрләре авылдашларына борынгы Орчык бәйрәмен тәкъдим итте, дип яза җирле басма.

Гадәттә елның бу фасылында уздырыла торган авыл утырмаларының театральләштерелгән куелышында әби-бабаларыбызның йолалары, җыр-биюләре, уеннары, тулаем авыл тормышы, көнкүреше тәкъдим ителде. Артистлар шулай ук акбашлыларга туган авыллары тарихы турында сөйләргә дә мөмкинлек тапты. “Ак калфак” җирле оешмасы җитәкчесе Венера Мезенцева билгеләп үтүенчә, кешеләр бер-береннән ераклашкан бу заманда мондый куелышлар аларга әби-бабаларыбызга хас булган җылы дуслык мөнәсәбәтләре турында искәртергә һәм аларны кешеләргә кайтарырга тиеш. Чараны мәдәният йорты җитәкчесе Резидә Газизуллина, сәнгать җитәкчесе Рузилә Газизуллина һәм “Әллүки” фольклор түгәрәгендә катнашучылар әзерләде.