Башкортстанда татар сәнгать әһелләре катнашында музыкаль-әдәби кичәләр булды

Милләткә хезмәт итүдә аеруча актив катнашкан милләттәшләребезгә Бөтендөнья татар конгрессы бүләкләре тапшырылды.

(Казан, 3 октябрь, «Татар-информ»). Татарстаннан бер төркем язучылар һәм артистлар Россия төбәкләрендә милләттәшләребез белән матур очрашулар уздыра. Бөтендөнья татар конгрессы Башкарма комитеты җитәкчесенең Россия төбәкләрендәге татар иҗтимагый берләшмәләре белән эшләү буенча урынбасары Марс Тукаев җитәкчелегендәге делегация Туймазы шәһәренә килде.

Биредә кунакларны Татар мәдәни үзәгендә милләттәшләр каршы ала. Бергәләп алар Үзәк каршындагы бөек шагыйребез Г.Тукайга куелган һәйкәлгә чәчәкләр салды. Шулай ук Төмәнәк авылындагы «Бабай утары» белән дә таныштылар. Бу хакта Бөтендөнья татар конгрессы матбугат хезмәте хәбәр итә.

Татарстаннан килгән делегация Бәләбәй, Бакалы, Бүздәк, Ярмәкәй, Шаран, Туймазы районннарыннан, Туймазы һәм Октябрьский шәһәрләреннән җыелган татар җәмәгатьчелеге вәкилләре белән очрашты.

Милләттәшләребез каршында Бөтендөнья татар конгрессы Башкарма комитеты җитәкчесенең Россия төбәкләрендәге татар иҗтимагый берләшмәләре белән эшләү буенча урынбасары Марс Тукаев чыгыш ясады. Ул залдагыларны Татарстан Премьер-министры урынбасары, Милли Шура рәисе Васил Шәйхразиев исеменнән сәламләде һәм татар конгрессы башкарган эшләр хакында сөйләде.

Чарада катнашучы язучылар үз иҗатлары белән таныштырды, телебезне, милли гореф-гадәтләребезне саклау мәсьәләләрен күтәрделәр. Очрашу Казан шәһәре филармониясе артистлары башкаруындагы җырлар белән үрелеп барды.

Милләткә хезмәт итүдә аеруча актив катнашкан милләттәшләребезгә Бөтендөнья татар конгрессы бүләкләре тапшырылды.