Мәдәният 3 май 2021 10:46

Казанда сугыш елларында төрле телләрдә чыккан листовка һәм газеталар күргәзмәсе ачыла

Әлеге уникаль экспозиция Татарстан Республикасында игълан ителгән Туган телләр һәм халыклар бердәмлеге елына багышланган.

Скопировать ссылку

(Казан, 3 май, «Татар-информ»). Казанның Халыклар дуслыгы йортында Бөек Ватан сугышы елларында Советлар Союзындагы төрле халыклар телендә дөнья күргән плакатлар, листовкалар һәм газеталар күргәзмәсе ачыла. Әлеге уникаль экспозиция Татарстан Республикасында игълан ителгән Туган телләр һәм халыклар бердәмлеге елына багышланган.

Тамашачыларга беренче тапкыр Кызыл армия Сәяси идарәсе листовкаларының татар, әрмән, азәрбайҗан, башкорт, грузин, кыргыз, таҗик, үзбәк һ.б. телләрдә басылган күчермәләре тәкъдим ителәчәк. Моннан тыш, күргәзмәдә тәүге тапкыр совет хәрбиләре үз телләрендә биргән ант текстлары белән дә танышырга мөмкин.

Язучы Илья Эренбургның сугышта катнашкан СССР халыклары турындагы мәкаләләр циклына аерым стенд багышланган. Ул «Татарлар», «Әрмәннәр», «Кыргызлар» һ.б. материалларны үз эченә ала.

Күргәзмәне оештыручылар репринтларның электрон күчермәләренә төрле музей һәм архивларда заказ биргән. Аларның бер өлеше моңа кадәр беркайчан да күргәзмәгә куелмаган һәм тар даирә белгечләргә генә билгеле булган, дип искәртә экспозицияне оештыручылар.

Күргәзмә Җиңү көне алдыннан, 8 майда ачыла. Керү – бушлай, дип хәбәр итә Халыклар дуслыгы йортының мәгълүмат үзәге.

Сәхифәләр

Казанда сугыш елларында төрле телләрдә чыккан листовка һәм газеталар күргәзмәсе ачыла