Сәхифәләр
«Татар-информ» мәгълүмат агентлыгы баш редакторы
Ринат Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор
Рәмис Латыйпов
Баш редактор урынбасары
Ләйсән Хафизова
Казанда Әлфия Авзалова турында инглиз телендә китап тәкъдим ителәчәк
Татар музыка мәдәниятенең күренекле вәкиле турында 2019 елда дөнья күргән китапны инглиз теленә тәрҗемә иттеләр һәм фоторәсемнәр белән тулыландырдылар.
(Казан, 2 март, «Татар-информ», Лилия Шәйхетдинова). Казанда Alfiya Avzalova китабын —ТАССРның халык һәм Россиянең атказанган артисты Әлфия Авзалова турында татар телендә чыгарылган китапның инглиз телендәге тәрҗемәсен тәкъдим итү булачак.
«Татар-информ»га бу хакта Әлфия Авзалова фонды җитәкчесе, җырчының кызы Зөлфия Нигъмәтҗанова-Авзалова хәбәр итте.
«Инглиз телендәге версиягә ихтыяҗ фонд үткәрә торган Әлфия Авзалова исемендәге Халыкара фестиваль-конкурска бәйле рәвештә туды. Мәсәлән, узган ел анда Америка, Төркия, Мисыр, Үзбәкстан, Казахстан вәкилләре катнашты. Шулай итеп без инглиз телендә дә моны күрсәтергә кирәклеген аңладык. Чит ил кунаклары бу җырчының үз вакытындаТатарстанда төрле телләрдә җырлаган бердәнбер җырчы икәнлеген белсеннәр иде», — дип сөйләде Зөлфия Нигъмәтҗанова-Авзалова.
Узган гасырда Әлфия Авзалова «Дөнья халыклары җырлары» программасы белән гастрольләрдә булды. Программада 13 телдә: инглиз, француз, испан, корея, кытай, идиш һәм башка телләрдәге җырлар кергән иде. «Куплетларның берсе һичшиксез татар телендә булыр иде. Шул рәвешле ул татар тыңлаучысына ул башкара торган җырларның асылын җиткерергә тели иде», — дип искәртте Нигъмәтҗанова.
Китапта аның тормыш юлы, замандашларының истәлекләре урын алган. Алдагы редакциядән аермалы буларак, китапның инглиз телендәге версиясенә нота-текст материалы эләкмәгән, ә фотогалерея киңәйгән.
«Анда ноталы материал юк, чөнки инглиз теле контингенты өчен бу кызык түгел. […] Китап аз санлы тираж белән без откан зур булмаган грант акчасына чыгарылды», — дип шәрехләде татар җырчысының кызы.
5 март көнне Кембридж халыкара Бала-Сити мәктәбендә, Татарстанда игълан ителгән Туган телләр һәм халыклар бердәмлеге елы кысаларында китапның музыкаль-әдәби презентациясе узачак. Alfiya Avzalova китабы Татарстан Республикасы Президенты Рөстәм Миңнеханов тарафыннан расланган күренекле җырчы истәлеген мәңгеләштерү программасын гамәлгә ашыру кысаларында нәшер ителгән.
Кызыклы яңалыкларны күзәтеп бару өчен Телеграм-каналга язылыгыз