Татарстанда концерт һәм массакүләм чараларны ачык һавада үткәрергә рөхсәт иттеләр

Ачык мәйданда үткәрелә торган чараларда катнашучылар саны 50 кешедән дә артмаска тиеш.

(Казан, 1 август, «Татар-информ»). Татарстан Хөкүмәте 3 августтан концерт һәм массакүләм чараларны ачык һавада үткәрергә рөхсәт итте. Әлеге яңалык хокукый мәгълүмат порталында дөнья күргән.

«Ял, күңел ачу, тамаша, мәдәни-агарту, физкультура, спорт, күргәзмә, реклама һәм башка чараларны, катнашучылар санын 50 кешедән арттырмау шарты белән, оештырырга рөхсәт ителә», — диелә документта.

Моннан тыш, 3 августтан кинотеатрлар, төнге клублар, балалар өчен уен бүлмәләре һ.б башка күңел ачу оешмалары да ачыла. Әлеге оешмаларга бер үк вакытта килүчеләр саны 50дән артмаска тиеш.

Элегрәк 1 августтан Россиядә халыкара элемтәнең өлешчә ачылуы хакында хәбәр ителгән иде. Беренче этапта Россия туристларын Бөекбритания, Төркия, Танзания кебек илләр кабул итәргә әзер.

«Татар-информ» агентлыгы элегрәк язып чыкканча, халыкара авиаэлемтәнең тулысынча кайчан ачылачагы да билгеле булды.