Чистайда рөхсәтсез төзелгән корылмаларны бульдозер ярдәмендә сүткәннәр
Урицкий урамы буенча 67 номерлы күпфатирлы торак йорт янында рөхсәтсез төзелгән гаражлар һәм сарайлар булган.
(Казан, 10 март, «Татар-информ»). Чистайда бульдозер ярдәмендә рөхсәтсез төзелгән корылмаларны сүткәннәр. Бу хакта «Чистай-информ» хәбәр итә.
Урицкий урамы буенча 67 номерлы күпфатирлы торак йорт янында рөхсәтсез төзелгән гаражлар һәм сарайлар булган. Быел 23 гыйнварда шәһәр хакимияте аларны сүтү нияте турында мәгълүмати хәбәрләр урнаштырган.
Шәһәр Башкарма комитеты, хәбәрләрне таратып, корылма хуҗаларына сарайларга үз хокукларын күрсәтергә вакыт биргән, әмма закон билгеләгән вакытта беркем дә моны эшләмәгән. «Россия Федерациясе Гражданлык кодексының 222 маддәсе нигезендә Россия Федерациясе Шәһәр төзелеше кодексының 55.32 маддәсе тәртибендә корылмалар сүтелде», – дип билгеләп үтә басма.
Чистайда законсыз корылмаларны сүтү эшен дәвам итү күздә тотыла.
