Чирмешәннең Иске Элмәле ансамбле Президент биргән акчага костюмнар тектерәчәк
“Ивушки” фольклор ансамбленә 300 мең сумга сертификат тапшырганнар.
(Чирмешән, 29 май, “Татар-информ“, “Безнең Чирмешән“, Гөлсирә Шәрифуллина). Лаеш районында узган “Каравон” рус фольклор фестиваленнан Иске Элмәле мәдәният йортының “Ивушки” фольклор ансамбле 300 мең сумга сертификат алып кайткан. Бу турыда район басмасы хәбәр итә.
Республика Президенты исеменнән әлеге бүләкне ансамбльнең 30 еллыгы уңаеннан һәм “Каравон”ның даими катнашучысы буларак тапшырганнар. Коллектив җитәкчесе Вера Захарова әйтүенчә, бу акчага алар яңа сәхнә костюмнары тектерергә ниятли.
Сүз уңаеннан, бәйрәмдә 150 гә якын коллектив чыгыш ясаган. Чирмешән районыннан “Ивушки”лардан тыш, Казанкадан - “Деревеньки”, Түбән Кармалкадан – “Забавушка” һәм район мәдәният йортыннан “Ветеран” ансамбльләре дә барган.