Чирмешәндә оешкан рок төркеме беренче концертын тәкъдим итте
Егермеләп җыры булган бу төркем район буйлап гастрольләргә чыга.
(Чирмешән, 30 гыйнвар, “Татар-информ“, “Безнең Чирмешән“, Гөлсирә Шәрифуллина). Әккәрәй мәдәният йортында “Невада” кавер рок төркеме беренче концертын тәкъдим итте. Бу турыда җирле басма хәбәр итә.
Әлеге төркем районда яшьләрнең ял итү үзәге каршында оешкан. Дүрт егет Айнур Заһитов, Руслан Васильев, Айрат Сәлманов, Данир Вилданов концерт программасы белән чыгыш ясар алдыннан бер елга якын репетицияләр үткәргәннәр, репертуар туплаганнар.
"Бүген безнең “багажда” 20 гә якын җыр бар. Әккәрәйдә тәүге концертыбыз булды. Без башка авылларда да чыгыш ясарга планлаштырабыз, якын арада Ивашкинога барырга җыенабыз", - диде төркемнең солисты Айнур Заһитов.