Җәмгыять 6 май 2017 00:00

Чирмешәндә “Үлемсез полк” маршына Трафимовлар да портретлар белән чыгачак

Җиңү бәйрәме, җырдагыча, күз яшьле бәйрәм - әтиләрне, бабайларны искә алу көне.

Скопировать ссылку

(Чирмешән, 6 май, “Татар-информ“, “Безнең Чирмешән“, Марат Гомәров). Чирмешәндә узачак “Үлемсез полк” маршына Трафимовлар да портретлар белән чыгачак. Чирмешәннән Владимир Трофимовның Әккәрәйдә яшәүче оныгы Оля узган елда “Үлемсез полк” маршына Пантелей бабасы портретын алып чыккан иде. Ә быел исә Җиңү бәйрәмен шул бабасының энесе Василийга “күрсәтмәкче”. Дөрес, мәрхүмнең фотосурәте булмаганлыктан, транспарантка аның исем-фамилиясе, туган, үлгән еллары гына язылган, дип яза район газетасы.

-Әтинең энесе, минем абзыем Василий Иванович Трофимовның фотосын эзләсәм дә - таба алмадым. Ул 1943 елда Ерак Көнчыгышта Һәлак булган. Сапер булган. Фотосалонда аның исем-фамилиясен язып, матур итеп рамка ясап бирделәр, бәясе дә кыйммәт түгел. Митингтан соң ул рамканы әтинең фотосы белән янәшә эләчәкмен, - ди Владимир Трофимов. - Май кердеме, мин ел да әтинең – Пантелей Ивановичның зурайтылган фотосын эш кабинетымнан өйнең иң түренә алып чыгып куям. Җиңү бәйрәме, җырдагыча, күз яшьле бәйрәм - әтиләрне, бабайларны искә алу көне.

Минем әти Пантелей Иванович 1939 елда армиягә алына, кайтырга гына дигәндә, сугыш башлана. Офицер булып, сугышчан медальләр тагып, 1946 елда туган авылына исән кайтырга насыйп була. Ул Польшага кадәр барып җиткән, сугыштан соң колхоз рәисе, аннан ветеринар булып эшләде. Әти 1967 елда дөнья куйды. Ә “Үлемсез полк”ны уйлап табучы - бик молодец кеше. Чөнки илебездән сугышта якыннарын, туганнарын югалтмаган гаилә бармы икән?! Без шулай мәрхүмнәрне искә алабыз, сугышны узганнарга хөрмәт күрсәтәбез. Балаларыбыз, оныкларыбыз моны күреп үсә, үзләре дә хәтер маршына чыга.

#Безнең Чирмешән

Сәхифәләр

Чирмешәндә “Үлемсез полк” маршына Трафимовлар да портретлар белән чыгачак