Чирмешәндә җитәкчеләр һәм депутатлар мәктәп укучыларына мәктәпкә җыенырга булыша
Алтмыш укучыга уку кирәк-ярак белән тулы букча тапшырылды.
(Чирмешән, 6 август, “Татар-информ“, “Безнең Чирмешән“, Кадыйр Гомәров). Чирмешәндә җитәкчеләр һәм депутатлар мәктәп укучыларына мәктәпкә җыенырга булыша. Бу турыда район басмасы хәбәр итә.
Яшьләр һәм физкультурачылар бәйрәме уңаеннан оештырылган тантанадан алтмыш малай һәм кыз уку кирәк-ярак белән тулы букчалар алып киттеләр. Аларга әлеге бүләк Татарстан Дәүләт Советы депутаты Рәис Сөләйманов, район һәм оешмалар җитәкчеләре, авыл җирлекләре Советлары, депутатлар ярдәмендә алынган.
"Игелекле иганәчеләргә бик зур рәхмәт, бүген ике улыбызга – Антонга һәм Евгенийга сумкалар бирделәр. Болай булгач без мәктәпкә әзер. Гаиләбез ишле, дүрт балабыз мәктәпне тәмамлады да", - ди Чирмешәннән Галина Перцева.
Гомумән, “Мәктәпкә җыенырга ярдәм ит!” акциясе кысаларында Чирмешәндә яшәүче балаларның күпчелегенә булышу җаен таптылар.