Җәмгыять 29 апрель 2017 09:00

Чирмешәндә инвалидларның кул эшләреннән күргәзмә ясадылар

Күргәзмәдә мәктәп укучыларының, урта яшьтәге хатын-кызларның, лаеклы ялда булган апаларның да күңел җылысы биреп башкарган эшләре урын алган.

Скопировать ссылку

(Чирмешән, 29 апрель, “Татар-информ“, “Безнең Чирмешән“, Кадрия Гамирова). “Язгы игелек атнасы” - изге эшләр эстафетасы #ДОБРЫЙТАТАРСТАН#МӘРХӘМӘТЛЕТАТАРСТАН акциясе кысаларында, район инвалидлар җәмгыяте туган як тарихы музее белән берлектә шул исем астында күргәзмә оештырдылар. Биредә мөмкинлекләре чикле һәм, гомумән, кул эшләренә хирыс булган егермеләп райондашыбызның эшләре урнаштырылган, дип яза район газетасы.

Күргәзмәдә мәктәп укучыларының, урта яшьтәге хатын-кызларның, лаеклы ялда булган апаларның да күңел җылысы биреп башкарган эшләре урын алган. Гади җепләрдән ниләр генә майтарып булмый икән, күргәзмәдә булган кеше моңа үзе дә инана һәм ирексездән бу могҗизаның серен беләсе, эшләнмәләрне тотып карыйсы килә.

Күргәзмәне ачу тантанасына бу осталарның барысы да килә алмаса да, күпчелеге монда иде, әлеге шөгыльгә кайчан, ничек өйрәнүләре турында үзләре сөйләделәр, тәҗрибә уртаклаштылар, кул эшенә өйрәтүчеләренә рәхмәтләрен җиткерделәр.

Әни өйрәтте, әни кушты, әни тәкъдим итте, кебек сүзләр еш яңгырады бу чарада. Дөрестән дә, күбесенең беренче укытучылары - әниләре.

Лашманнан килгән, мөмкинлеге чикле, 8 класс укучысы Алсу Гыймранова да әнисенә һәм сәнгать мәктәбендә укыткан укытучыларына бик рәхмәтле.

-Мин рәсем ясарга да, чигәргә дә, ыргак белән бәйләргә дә яратам, дәресләрдән бушаган вакытымны файдалы итеп үткәрергә тырышам, - ди Алсу. – Төрле формадагы мунчалалар бәйләргә, төсле җепләрдән чәчәкләр ясарга әни белән Интернеттан өйрәндек.

Иске Кадидан Илсөя Кәлимуллина белән Гөлсирень Мортазиналарның да кул эшләре, күңел җимешләре күргәзмәдә урын алган.

Чирмешәннән Людмила Кузинаның төсле тасмалардан ясалган картиналарын күргән кеше “Ах” итәр, монда күпме көч салынган, күпме күз нуры түгелгән?!

Күргәзмәдә Мария Микушованың ыргак белән бәйләнгән мендәр япмаларын да күрергә була. Быел 90 яшен тутыручы якташыбыз хәзер челтәр бәйләмәсә дә, әле кулыннан энәләрен куймаган, балаларын, оныкларын җылы оекбашлар бәйләп куандыра икән. Бу кешеләрнең сабырлыгына сокланмый мөмкин түгел, диелә район хәбәрендә.

#Безнең Чирмешән

Сәхифәләр

Чирмешәндә инвалидларның кул эшләреннән күргәзмә ясадылар