Чирмешәндә 37 шәхси йорт файдалануга тапшырылган
Хәзер субсидия алуга 184 гаилә чиратта тора.
(Чирмешән, 30 июль, “Татар-информ“, “Безнең Чирмешән“, Гөлсирә Шәрифуллина). Агымдагы елның беренче яртыеллыганда Чирмешән районында гомуми мәйданы 3482 квадрат метр булган 37 шәхси йорт файдалануга тапшырылган, ягъни еллык планның 70 проценты диярлек. Бу турыда җирле басма хәбәр итә.
Керкәле авылындагы сигез йорт “Арендага – торак” программасы кысаларында республиканың дәүләт торак фонды аша төзелде. Ел ахырына кадәр монда һәм Чирмешәндә, Күтәмәдә, Урманасты Үтәмештә арендага бирү өчен 33 йорт салынырга тиеш.
-Районда тораклы булырга теләүчеләр бик күп, - ди районның башкарма комитетының торак сәясәте бүлеге баш белгече Рәмзия Гайсина. -Беренче яртыеллыкта тугыз яшь гаилә торак төзүгә 4 миллион 188 мең сум субсидияле булды һәм авыл җирендә яшәүчеләр өчен программа нигезендә тагын сигез гаилә шул ук күләмдә дәүләт ярдәмен алды.
Барлыгы – 8 миллион 476 мең сум. Хәзер субсидия алуга 184 гаилә чиратта тора. Барысы да финанслауга бәйле.
2006 елдан, авыл җирендә яшәүчеләргә шундый ярдәм күрсәтелә башлаганнан бирле, дәүләт ярдәме алган 229 кеше өй туе үткәргән, аларга барлыгы 193 миллион 209 мең сум акча бирелгән.