Җәмгыять 1 декабрь 2018 06:00

Чирмешән районының Түбән Кәминкә авылында каз өмәсе оештырганнар

Түбән Кәминкәдәге “Ак калфак” оешмасы бүлекчәсе хатын-кызлары да шундый өмә уздырдылар.

Скопировать ссылку

(Чирмешән, 1 декабрь, “Татар-информ“, “Безнең Чирмешән“, Кадрия Гамирова). Чирмешән районының Түбән Кәминкәдәге “Ак калфак” оешмасы бүлекчәсе хатын-кызлары каз өмәсе оештырганнар. Бу турыда район газетасы яза.

Унбишләп хатын-кыз иртән үк Хәлимә һәм Азат Гайнуллиннар йортына күмәк эшкә җыелды. Инеш буеннан юындырып алып кайткан егермеләп ап-ак казларны җырлый-җырлый, бик тиз йолкыдылар. Уңган-булган авыл хатыннары эш арасында уен-көлкегә дә урын тапты.

Аннан соң, йолкып, эчләре алынган түшкәләрне көянтәләргә асып, Каенлы чишмәсе буена төшеп чайкадылар. Нәкъ җырдагы кебек, су буена каз каурыйлары да сиптеләр. Каз каурыйларын су юлына сипсәң киләсе елда да казлар уңачак дигән ышану, йола бар.

Бөтен эшләр дә беткәч, каз йолкучылар каз тәпиләре салып пешерелгән бәлеш һәм каз шулпасы белән сыйландылар.

Гайнуллиннар һәр елны бу кошларны күпләп асрый, каз түшкәләренә хуҗалар да табылып тора. Быел алар 35 баш бәбкә алып үстергәннәр.

#Безнең Чирмешән

Сәхифәләр

Чирмешән районының Түбән Кәминкә авылында каз өмәсе оештырганнар