Җәмгыять 18 декабрь 2018 06:00

Чирмешән районында кар өстеннән йөри торган машиналарны тикшерәләр

"Кар машинасы" операциясенең төп бурычы - әлеге техниканы файдаланганда хәвефсезлек техникасы таләпләренең төгәл үтәлүен тикшерү.

Скопировать ссылку

(Чирмешән, 18 декабрь, “Татар-информ“, “Безнең Чирмешән“, Гөлсирә Шәрифуллина). 12 декабрьдән 29 декабрьгә кадәр «Кар машинасы - 2018» профилактик операциясе уздырыла. Бу уңайдан оештырылучы бердәм рейдларда дәүләт техник күзәтчелеге, ЮХИДИ, янгын-коткару, аучылык хезмәте хезмәткәрләре катнаша. Бу турыда район басмасы хәбәр итә.

Тикшерү барышында машиналарның теркәлү мәгълүматларына туры килү-килмәвенә, кагыйдәләрнең үтәлешенә, техник карау узу-узмауга, мототранспортка кенәгәсе булу-булмауга зур игътибар биреләчәк.

Кар машиналары белән бәйле, кешеләр үлеменә һәм имгәнүенә китергән фаҗигаләр ел саен булып тора. Шуңа күрә "Кар машинасы" операциясенең төп бурычы - әлеге техниканы файдаланганда хәвефсезлек техникасы таләпләренең, юл хәрәкәте кагыйдәләренең төгәл үтәлүе, кар машинасы белән бәйле һәлакәтләрне булдырмау, кешеләрнең имгәнүенә юл куймау.

Инспектор әйтүенчә, бүген районда 35 кар машинасы (снегоход) бар. Теркәлмәгән мототехниканы йөртүчеләр дә булгалый икән. Алай йөрүчеләргә штраф та каралган: гражданнарга – 1500 сумнан 2000 гә кадәр, вазифаи затларга – 2000 сумнан - 3500 гә, юридик затларга - 5000 сумнан 10000 сумга кадәр.

Аек булмаган хәлдә техника белән идарә итүче ачыкланган очракта, аны машина һәм үзйөрешле машиналар йөртү хокукыннан мәхрүм итәчәкләр.

#Безнең Чирмешән

Сәхифәләр

Чирмешән районында кар өстеннән йөри торган машиналарны тикшерәләр