news_header_top_970_100
news_header_bot_970_100

Чирмешән районында берьюлы өч мәктәп ачылды

Аларны нефтьчеләр ярдәме белән ремонтладылар.

(Чирмешән, 18 ноябрь, “Татар-информ“, “Безнең Чирмешән“, Кадыйр Гомәров). Чирмешән районында, ремонттан соң, берьюлы өч мәктәп ачылды. Районда, үзгәртеп корганнан соң, берьюлы өч мәктәп кабат үз ишекләрен ачты. Аларны нефтьчеләр ярдәме белән өр-яңа иттеләр, дип яза җирле басма.

Бүген 77 бала белем алучы, 29 ел элек ачылган Ульяновка мәктәбенә ремонт бик кирәк иде. Рәхмәт, “Татнефть“ булышлыгы белән, Татарстан Республикасы Дәүләт Советы депутаты Илгиз Салихов та хәлебезгә кергәч, бинага быел җәй төзүчеләр килде. Нефтьчеләр – конкрет, төгәл, заманча, кешеләр барын да сыйфатлы эшләгәннәр. 12 миллион сумга су, электр, җылылык челтәрләре яңабаштан ясалган, түбә, стена, идәннәр дә үзгәргән, эчтә үк бәдрәфләр барлыкка килгән, җиһазлар да яңарган.

-Нефтьчеләргә, төзүчеләргә, Президентыбыз Рөстәм Миңнехановка, мәктәп коллективына, ата-аналарга да бик зур рәхмәт, - диде район башлыгы Фердинат Дәүләтшин тантанага килүчеләрне котлап. - Бина өр-яңа кебек булган. Монда балалар бик яхшы билгеләргә генә укырга тиеш.

“Нурлатнефть“ идарәсе җитәкчесе, Татарстан Республикасы Дәүләт Советы депутаты Илгиз Салихов та биредә. Аның әйтүенчә, быел Чирмешән районына нефтьчеләр аеруча нык булышкан, юлларны, социаль объектларны ремонтлауга, үзгәртеп коруга ярты миллиард сум чамасы(!) акча тотылган. Соңгы ике елда мәктәпләр, балалар бакчаларын, мәдәният йортларын капиталь ремонтлауга, аерым программа буенча, 122 миллион сум акча юнәлдергәннәр. Бу ярдәм тукталмый, дәвам итәчәк.
Иске Элмәле мәктәбен дә танырлык түгел, монда да нефтьчеләр биргән 11,6 миллион сум акчага зур ремонт ясаганнар. Балалар бакчасын да читтә калдырмаганнар. Биредәге мәктәптә 72 бала укый, бакчада 20 бала тәрбияләнә.

Тиздән Иске Элмәле мәктәбе яңа котельныйдан җылы ала башлаячак. Бу эшне район акчаларына башкаралар.

Район мәгариф бүлеге начальнигы Светлана Әхтәмова, мәктәп директоры Владимир Мануйлов, мәктәпнең элеккеге директоры Татьяна Овчинникова бәйрәмгә җыелган халык исеменнән җитәкчеләргә, төзүчеләргә рәхмәт белдерделәр, ярый әле бездә нефть бар, нефтьчеләр гел булышып торалар, диделәр.

Иске Элмәледә өр-яңа төс алган, бөтен уңайлыклар тудырылган кабинетларны карагач, кунаклар һәм җитәкчеләр Кармышка юл алды. Әлеге авыл мәктәбендә 42 бала белем ала, дөресен әйтик, азрак. Бина исә мөгаен ике йөз кеше дә сыярлыктыр. Бик иркен, иң коридорлар, зур кабинетлар, сыйфатлы ремонт 35 еллык бинаны үзләре мактап тора. 11 миллион сумга якын акча әрәм булмаган.

-Сездә хәзер бар да бар, башта мәдәният йорты, аннары мәктәп ремонтланды, балалар бакчасында төзүчеләр эшли, - диде район башлыгы Фердинат Дәүләтшин, кармышлыларның эштә дә уңган булуларын әйтеп. -Әмма гөрләп яшәргә тиеш мәктәптә укучылар саны аз, бу хәл борчулы уята. Укучылар саны кимү мәктәпнең статусы кечерәюгә дә китерергә мөмкин.

“Нурлатнефть“ идарәсе начальнигы Илгиз Салихов бу тирәдә нефть, аеруча битум ятмаларының байлыгы биредә яшәүчеләрнең тормыш-көнкүрешендә уңай чагылыш табарга тиешлеген белдерде, олы трассадан монда алып керүче зур юлны капиталь ремонтлауда да нефтьчеләр ярдәм күрсәтәчәгенә ышандырды, мәктәп укучыларын нефтьче һөнәрен сайларга өндәде, диелгән район хәбәрендә.

 

news_right_column_1_240_400
news_right_column_2_240_400
news_bot_970_100