Хәвеф-хәтәр 19 март 2017 10:03

Чиләбедә ике кешене бәрдереп качкан исерек йөртүчене тоткарлаганнар

Юл-транспорт һәлакәтендә җәяүлеләрнең икесенең дә гомере өзелгән.

Скопировать ссылку

(Казан, 19 март, "Татар-информ"). Чиләбедә җәяүлеләр өчен билгеләнгән юл аша чыгу урынында ике җәяүлене бәрдергән машина йөртүчегә карата җинаять эше кузгату мәсьәләсе хәл ителә. Машина йөртүче исерек хәлдә һәм йөртү таныклыгы да булмаган, дип җиткерә "Российская газета" шәһәрнең ЮХИДИ идарәсенә сылтама белән.

Юл-транспорт һәлакәте бу төндә булган. 33 яшьлек машина йөртүче ВАЗ-21103 автомобиле белән җәяүлеләр өчен билгеләнгән юл аша чыгу урынында ике кешене бәрдерә һәм качып китә. Оператив-эзләү чаралары ярдәмендә аның эзенә бик тиз төшәләр. Аның исерек хәлдә булуы һәм аек булмаган хәлдә транспорт белән идарә иткәне өчен "права"сын алдырган булуы ачыклана.

Ике җәяүле дә – 28 һәм 30 яшьлек ир-атлар урында ук вафат булган. Тоткарланган машина йөртүчегә 9 елга кадәр иректән мәхрүм ителү яный.

#Чиләбе #һәлакәт

Сәхифәләр

Чиләбедә ике кешене бәрдереп качкан исерек йөртүчене тоткарлаганнар