Чаллыдагы көллият студентының туберкулез белән авыруы ачыкланган
Авыру белән аралашучыларның барысы да флюорография һәм диаскинтест уза.
(Казан, 21 март, "Татар-информ"). Чаллыда КФУның инженер-икътисади көллияте студентында туберкулез авыруы ачыкланган. Аның белән аралашкан кешеләрне тикшеренүгә җибәргәннәр. Бу турыда "Татар-информ" агентлыгына ТР Роспотребнадзор идарәсе матбугат хезмәтендә хәбәр иттеләр.
"Хәзерге вакытта авыру белән контактта булучыларның барысы да флюорография һәм диаскинтест уза. Мондый очракта бу гадәттәгечә кулланыла торган процедуралар", - дип аңлаттылар ведомствода.
Көллияттә укучы кыз туберкулезның кече формасы белән авырый. Санитария күзәтчелеге хезмәткәрләре мәгълүматы буенча, бу - көллияттә ачыкланган беренче очрак.
"Әлеге очрак чираттагы тапкыр туберкулезга тикшеренүне даими узу кирәклеген раслый", - дип аңлаттылар Роспотребнадзорда.