Хәвеф-хәтәр 29 август 2018 14:43

Чаллыда яшүсмерләр белән низагтан соң, ир-ат үлеме буенча 16 яшьлек егетне тоткарлаганнар

Автошәһәрнең 32нче комплексында яшүсмерләр кыйнаган ир-атны табиблар коткарып кала алмаган.

Скопировать ссылку

(Чаллы, 29 август, “Татар-информ”, Эльвира Мөхәммәтдинова). Чаллыда яшүсмерләр белән низагтан соң, 49 яшьлек ир-атның үлеме турындагы җинаять эше буенча 16 яшьлек егетне тоткарлаганнар. Бу хакта Россия Тикшерү комитетының Татарстан буенча Тикшерү идарәсе Чаллы бүлекчәсе җитәкчесе урынбасары Илдар Шакиров хәбәр итте.

17 июльдә Автошәһәрнең 32нче комплексында шунда яшәүче ир-атның балалар мәйданчыгында көнбагыш ашап утыручы яшүсмерләргә кисәтү ясавы, яшьләрнең моңа ачулары кубуы һәм сугышулары турында хәбәр иткән идек. Урынга килгән табиблар коткарып кала алмаган, ир-ат үлгән.

“Суд-медицина экспертизасы күрсәтүенчә, ир-ат йөрәк өянәгеннән үлгән. Аның муен өлешендә сынган җәрәхәт урыны сугудан булуы ихтимал. Сугу белән үлем арасында турыдан-туры бәйләнеш ачыкланмаган. Экспертиза үлгән кеше канында алкоголь булуын күрсәткән”, - дип әйткән Шакиров.

16 яшьлек егет әлегә 48 сәгатькә тоткарлаган, гаепләү аңа белдерелмәгән. Якын арада аңа чикләү чарасы каралачак.

#җинаять

Сәхифәләр

Чаллыда яшүсмерләр белән низагтан соң, ир-ат үлеме буенча 16 яшьлек егетне тоткарлаганнар