news_header_top_970_100
news_header_bot_970_100

Чаллыда дельфинарий булачак

Чаллыда дельфинарий булачак

(Чаллы, 30 март, “Татар-информ”, Илисә Ганиева). Чаллыда быел дельфинарий пәйда булачак. Аны “Дельфин” бассейнының сикерү ваннасы базасында Анапа шәһәре дельфинарие җитәкчелеге тәкъдим иткән. Алар фикеренчә, автошәһәрдә моның өчен барлык шартлар да бар.

Суга сикерү ваннасы аерым бинада урнашкан, анда алты метр тирәнлектәге, 25 метр озынлыктагы бассейн бар. Биредә дүрт дельфин, шул ук санда диңгез арысланы һәм хәтта бер кит яши ала. Дөрес, унбиш ел кулланылмаган бина ремонтка мохтаҗ. Аны тиешле хәлгә китерү өчен аренда хисабына инвесторлар 5,5 миллион сум кертергә әзер. Алар шулай ук диңгез суын регенерацияләү системасын, тамашачылар трибунасын урнаштырачак, диңгез җәнлекләрен алып киләчәк.

Дельфиннар белән тамашалар күрсәтүдән тыш, дельфинотерапия сеанслары үткәрү каралган. Бассейнда дельфиннар белән бергә йөзеп, стресстан арынырга мөмкин. Булачак дельфинарий урынында ремонт эшләрен майда башларга ниятлиләр, ә беренче тамаша агымдагы елның сентябрендә үк узарга тиеш.

news_right_column_1_240_400
news_right_column_2_240_400
Медиаметрикс
news_bot_970_100