Чаллыда 10 мең кеше үзмәшгуль булып теркәлгән
Шәһәрдә кече һәм урта эшмәкәрлекнең барлыгы 27,6 мең субъекты бар, аларда 55 меңнән артык, ягъни шәһәрдәге хезмәткәрләр санының өчтән бере диярлек эшли.
(Чаллы, 30 декабрь, «Татар-информ», Эльвира Мөхәммәтдинова). Чаллыда үзмәшгульләр сыйфатында 10 мең кеше теркәлгән. Бу хакта мэриядә узган киңәшмәдә билгеле булды.
Үзмәшгульләрнең бизнес-эшчәнлеге нәтиҗәсендә шәһәр бюджетына быел 11 айда 6 млн сум салым кергән.
«Бүген үзмәшгульләр — интеллектуаль хезмәт һәм конкрет җитештерү белән шөгыльләнүче әзерлекле кешеләр. Иртәгә һәм берсекөнгә алар кече һәм урта бизнес предприятиесе җитәкчесе булырга мөмкин», — диде Автошәһәр башлыгы Наил Мәһдиев.
Шәһәрдә барлыгы 27,6 мең кече һәм урта эшмәкәрлек субъекты эшли, аларда 55 меңнән артык, ягъни шәһәрдәге эшчеләр санының өчтән бере диярлек кеше хезмәт куя. Бу «Камаз"дагыдан да күбрәк. Ә ялланган хезмәткәрләрне дә исәпкә алсак, шәхси эшмәкәрләрдә 80 меңнән артык кеше эшли.
Тулаем территориаль продуктта кече һәм урта эшмәкәрлек өлеше 33,4 процент тәшкил итә (Татарстанда бу күрсәткеч 25,5 процент дәрәҗәсендә), зур булмаган предприятиеләрдән кергән салымнар өлеше — 34 процент.
«Ел нәтиҗәләре буенча кече һәм урта предприятиеләрнең әйләнеше, безнең бәяләүләр буенча, 2 процентка артачак һәм 209,3 млрд сум тәшкил итәчәк. Бу шәһәр сәнәгатенең дүрттән бер өлеше диярлек», — дип искәртте Мәһдиев.