news_header_top_970_100
news_header_bot_970_100

Чаллы лидерлары Дмитрий Медведев белән очрашуга барачак

Чаллының 10 лидеры РФ Президенты белән очрашуга әзерләнә

(Чаллы, 2 декабрь, “Татар–информ”). “Прорыв” Бөтенроссия җиңүчеләр форумы сайтында (www.fp2009.ru) илнең яшь лидерына тавыш бирергә мөмкин.
Җиңүчеләр форумында Россия һәм республика конкурсларында җиңүчеләр катнаша. Алар арасында Чаллыдан Рамил Моратов, Алексей Домышев, Артем Кудряшов, Константин Мамаков, Анна Гилева һәм Евгений Сироткин бар, дип хәбәр итә Автошәһәрнең яшьләр эшләре идарәсе матбугат хезмәте.
Форум нәтиҗәләре буенча һәр катнашучы өчен фото һәм видеоматериаллар белән шәхси профайллар төзеләчәк, алар уникаль кадрлар банкына кертеләчәк. Аны чикләнгән тираж белән DVD-дискларда чыгарачаклар. Кадрлар банкы базасы илнең яшь лидерларына тәкъдим итәрлек әйбере булган оешмаларга гына ачык булачак.
Форумның төп бурычларыннан берсе – сәләтле яшь кадрлар табуда Россия компанияләренә ярдәм итү. Җиңүчеләр форумында катнашучыларның һәркайсына РФ субъектлары, төп федераль ведомство һәм корпорацияләрдә сәләтле яшьләр белән эшләүдә җаваплы кешеләрнең телефон номерлары урын алган белешмәлек биреләчәк. Форумнан соң талантлы яшьләр белән эшләү буенча программаларны гамәлгә ашыручы министрлык, ведомство, төбәк хакимият органнары һәм башка структура вәкилләре белән турыдан–туры элемтәгә керергә мөмкин булачак.
Тавыш бирү нәтиҗәләре буенча 17 декабрьдә “Олимпийский” спорт комплексына РФ Президенты Дмитрий Медведев белән очрашуга барачак иң яхшы яшь лидерларны сайлап алу күздә тотыла.
Сез үз кандидатыгыз өчен форумның сайтында тавыш бирә аласыз. Искәртеп узабыз, илнең яшь лидеры исеменә дәгъва кылучыларның берсе – “Татар–информ” мәгълүмат агентлыгының Чаллыдагы үз хәбәрчесе Евгений Сироткин.


news_right_column_1_240_400
news_right_column_2_240_400
news_bot_970_100