Мәдәният 10 октябрь 2017 08:12

Чүпрәледә кинозал эшли башлады

Аны ачу уңаеннан Алексей Пимановның "Крым" кинофильмы күрсәтелде.

Скопировать ссылку

(Чүпрәле, 10 октябрь, "Татар-информ", "Туган як", Гөлия Фәизова). Чүпрәле районында күптән көтелгән заманча кинозал эшли башлады. Аны ачу уңаеннан Алексей Пимановның "Крым" кинофильмы күрсәтелде, дип яза җирле басма.

-Район халкы кино челтәре эшләгән елларны бик яхшы хәтерлидер. Күрше районнардан әйләнеп кайткан фильмнарны, хәтта иртәнге 4кә кадәр көткән вакытлар да булды. Халык та таралмый иде шул чакта,-дип башлады сүзен район Башкарма комитеты җитәкчесе урынбасары Айрат Җәлалов чарада. –Бүген исә, янә шул вакытларга кайттык, шәһәрдәге заманча кинозал хәзер менә үзебездә дә бар, рәхәтен күрергә булсын.

Районда кинозал булдыру турында моннан берничә ел элек үк сүз алып барылды. Үткән ел исә, район мәдәният йорты конкурста катнашып, заманча кинозал өчен җиһазлар алуга 5 млн сумлык грант отты. Һәм менә быелдан район мәдәният йорты сәхнәсе кинозал ролен дә үтиячәк.

Әлеге эшләрне башкаруда "МТД ПЛЮС" оешмасы да ярдәмгә килә. Аның җитәкчесе Евгений Нежинский тантанада катнашып, республикада 15ләп шундый кинозаллар ачылуы хакында белдерде. Ә менә чүпрәлеләр аның тагын да заманчасы - лазерлы булуы белән дә откан.

Шулай итеп, хәзер илдә яңа кинолар дөнья күрүгә үк,ягъни кинопрокаттагы барлык премьераларны үзебездә карау мөмкин булачак. Шулай ук, балалар өчен яңа мултьфильмнар да тәкъдим ителәчәк.

Кинозал дүшәмбедән кала һәркөнне 10.00 кичке 23.00 сәгатькә кадәр эшли.

#Чүпрәле #Туган як

Сәхифәләр

Чүпрәледә кинозал эшли башлады