Чечня телерадиокомпаниясе директоры: Татарстанда балалар телеканалы булу тәэсир калдырды
«Грозный» Чечня дәүләт телерадиокомпаниясе директоры, Чечня Республикасының атказанган журналисты Чынгыз АхмадовныТатарстанда балалар өчен аерым телеканал булу тәэсирләндергән. Бу хакта ул «Татар-информ» хәбәрчесенә сөйләде.
«Мөмкинлек булганда, мин Казанга килергә тырышам. Быел ике тапкыр килдем. Татарстан бик рәхәт хисләр калдыра. Татарстанда яшәүче халыкларның мәдәниятне, телне саклаулары хөрмәткә лаек. Татарстанда массакүләм мәгълүмат чаралары эше бик югары дәрәҗәдә оештырылган, мондагы тәҗрибәне без үзебездә кулланырга тырышабыз. Телевидениегә килгәндә, балалар өчен аерым телеканал булу тәэсирләндерде Балалар үзләренең иҗади мөмкинлекләрен күрсәтә ала», – дип сөйләде ул.
Ул Татарстандагы журналистлар белән эшчәнлекне тирәнәйтү, киңәйтү теләге булуын әйтте. Телеканал эшчәнлеге турында да сөйләп үтте.
«Бездә тапшырулар рус һәм чечен телендә чыга. Инглиз һәм гарәп телендә хәбәрләр дә чыга, аны ясалма фәһем тәрҗемә итә. Бездә дә телне саклауга зур игътибар бирелә. Без дә географик атамаларны, дәүләт учреждениеләре исемнәрен ике телдә дә күрсәтергә тырышабыз», – дип сөйләде ул.
«Грозный» телерадиокомпаниясе «Многоликая Россия» XV Бөтенроссия журналистлар бәйгесендә «Телесюжетлар циклы» номинациясе 1нче урынны яулады.