Чаллы табиблары Актаныш кешесенә операцияне бот тамырыннан кереп ясаган
Чаллы табиблары Актаныштан килгән пациентка йөрәк вальвупластикасы процедурасын үткәрәләр. Операция вакытында күкрәк читлеген ярмыйлар, йөрәккә боттагы кан тамырлары аша үтәләр. Бу хакта «Шәһри Чаллы» газетасы хәбәр итә.
Табиблар Актанышта яшәүче Тимергали Һадиевның йөрәге белән бәйле проблемаларны Ашыгыч медицина ярдәме хастаханәсенә килгәнче үк ачыклый. Заманча җиһазлар кардиологларга 140 км ераклыктан йөрәк клапаны эшчәнлегендә ят тавышлар ишетергә мөмкинлек бирә. Ашыгыч медицина ярдәме күрсәтү хастаханәсенә килгәч, диагноз тулысынча раслана. Пациентка югары технологияләрне кулланып, катлаулы операция - йөрәк вальвупластикасы процедурасын үткәрәләр.
Бу технология бөтен дөньяда алдынгы санала. Ашыгыч медицина ярдәме хастаханәсе табиблары аны Татарстанда беренче булып үзләштерә. Мондый ысулны куллану ачык хирургия ярамаган кешеләрнең гомерен саклап калырга ярдәм итә. Бу очракта тернәкләнү дә тиз уза. Пациент та операциядән соң берничә көннән өенә кайтып китә.