Чаллыда Кол Галинең «Кыйссаи Йосыф» поэмасына багышланган кичә узды
Кичә Чаллы шәһәре Үзәк китапханәсендә, Кол Галинең «Кыйссаи Йосыф» поэмасына багышланган «Мәңгелек мәхәббәт тарихы» исемле кичә узды. Бу хакта Татарстан Язучылар берлеге матбугат хезмәте хәбәр итә.
Чарада Чаллы язучылары: Татарстан Язучылар берлеге рәисе урынбасары – Чаллы язучылар бүлеге җитәкчесе Факил Сафин, Әнвәр Шәрипов, Рәзинә Мөхияр, Лилия Гыйбадуллина, Айрат Суфиянов, Мансур Сафин, Рәкит Аллабирде, Зөләйха Минһаҗева, Айрат Шәйхетдинов катнаштылар, һәркем өчен иң изге, иң кадерле булган хис – мәхәббәткә багышланган шигырьләрен укыдылар.
Габдулла Тукай исемендәге дәүләт премиясе лауреаты, филология фәннәре кандидаты Факил Сафин, әдәбият галиме Әнвәр Шәрипов, филология фәннәре кандидаты, педагог Лилия Хөснетдинова, галимә Рәзинә Мөхияр татар әдәбиятының борынгы ядкяре, Идел буе Болгары дәүләтеннән калган бердәнбер әдәби әсәр тарихына караган мәгълүматлар белән таныштырдылар, поэмада күтәрелгән әхлакый, фәлсәфи һәм әдәби мәсьәләләрнең киң яктыртылуын ассызыклап үттеләр.
Кичәне ямьләп килгән, Чаллы язучылар бүлеге каршында эшләп килүче әдәби берләшмә әгъзалары – Чаллыдан «Ләйсән», Түбән Камадан «Кама таңнары», Алабугадан «Чулман», һәм шулай ук Сарман, Менделеевск, Зәй кунаклары мәхәббәткә дан җырлаган шигырьләрен сөйләделәр, диелә хәбәрдә.
Фото: © Татарстан Язучылар берлеге матбугат хезмәте