Җәмгыять 26 май 2022 12:38

Чаллыда, 300 метр озынлыгындагы шашлык кыздырып, гастрономик рекорд куячаклар

Скопировать ссылку

Чаллыда, Россиядә иң зур шашлык (аның озынлыгы 300 метрга якын булачак) кыздырып, гастрономия рекорды куярга әзерләнәләр. Чара 25-26 июньдә узачак. Бәйрәмне оештыручы Алексей Ковалев «Татар-информ» агентлыгына шулай дип белдерде.

«Чараның максаты – коронавируска бәйле чикләүләрне гамәлдән чыгарганнан соң бәйрәм оештыру һәм халыкны җәлеп итү. Җирле компанияләр үзләрен күрсәтә, ә кешеләр ял итә алачак. Беренче көнне балалар дискотекасы, меню, Чаллыдагы ресторан-кафелар белән танышу каралган. Шулай ук Татарстан һәм Россиянең башка шәһәрләрендәге компанияләрне дә җәлеп итәргә ниятлибез. Хәзерге вакытта сыр ясау предприятиесе белән сөйләшүләр алып барыла, шулай ук сувенир ясаучылар да кирәк», - дип искәртте ул.

Икенче көнне гастрономия рекорды кую күздә тотыла. «Кызганыч, санкцияләр аркасында дөнья рекорды куеп булмаячак. Әмма Россиянең Рекордлар китабы белән килешү бар. 300 метрлы иң озын шашлык кыздырып, соңыннан аны чарага килүчеләргә бушлай таратачакбыз. Бер үк вакытта сәүдә рәтләре эшләячәк һәм концерт тәкъдим ителәчәк. Бәйрәмдә «Хитобои» төркеме, шулай ук җирле коллективлар чыгыш ясар дип көтелә», - дип ачыклык кертте Алексей Ковалев.

Сәхифәләр

Чаллыда, 300 метр озынлыгындагы шашлык кыздырып, гастрономик рекорд куячаклар