Чаллы мэры: Мин сайлауларны бәйрәм кебек кабул итәм
Чаллы мэры Наил Мәһдиев сайлау участогына иртәнге 9 сәгатьтә килеп, Россия Президентын сайлауда беренчеләрдән булып тавыш биргән.
«Барлык эшләрдә һәм гамәлләрдә җитәкче беренче булырга тиеш. «Минем кебек эшлә» дигән принцип бар. Син үз үрнәгең белән, Ватанга мөнәсәбәтең белән ничек яшәргә кирәклеген күрсәтәсең», – дип әйткән Наил Мәһдиев. Аның сүзләрен шәһәр администрациясенең матбугат хезмәте җиткерә.
«Сайлауларга килеп, кеше үзенең Ватанга мөнәсәбәтен, иртәгә булачак барлык процессларга катнашын сизә. Мин сайлауларны бәйрәм кебек кабул итәм. Мондый катлаулы вакытта сайлаучыларның катнашуы чын патриотизмны белдерә. Әгәр син чын патриот булсаң, үз илеңнең бүгенгесе һәм киләчәге өчен тавыш бирергә тиеш», – дигән Чаллы мэры.
Аның сүзләренчә, һәр кандидат ил башлыгы булырга лаек. «Һәркем үзе теләгән кешегә тавыш бирә. Мондый принцип демократик дәүләтләргә хас», – дигән ул.
Мәһдиев сайлау участогында эшләүчеләргә һәм күзәтүчеләргә хезмәтләре өчен рәхмәт әйткән һәм аларга сабырлык теләгән.