Чаллы ашыгыч медицина ярдәме хастаханәсе табибы 7 көн буе тауга менгән
Чаллы ашыгыч медицина ярдәме хастаханәсе табибы – утратавыш диагностикасы бүлеге мөдире Роман Джумабаев Килиманджаро тавына менде. Әлеге тау дөньяда иң биек таулар исемлегенең дүртенче урынында. Биеклеге – 5895 метр. Иң югары ноктага менеп җитү өчен 7 көн кирәк булган. Бу хакта «Шәһри Чаллы» газетасы хәбәр итә.
Чаллы табибы төркемендә Америка, Сингапур һәм Бөекбритания туристлары да булган. Барлыгы 13 кеше. Тик бөтенесе дә тау башына менеп җитә алмаган. Өч кеше кире борылган.
Искәртик, Роман Джумабаев узган ел Эльбруска менгән иде.
«Аркама ике операция кичергәннән соң, үземә «чакыру» ясарга булдым. Авыртулар бетмәде. Спорт белән шөгыльләнергә, нык булырга туры килде. Европаның иң биек тавына менү үземне сынау өчен менә дигән чара дигән фикергә килдем», – дип сөйләгән иде табиб ул вакытта.