Чаллы активисты махсус хәрби операциядә катнашучыларга 200 кг чәкчәк җибәрде
Чаллы Территориаль иҗтимагый үзидарә рәисе Мәдинә Мөхәммәтҗанова махсус хәрби опреция зонасындагыларга тагын 20 кг чәкчәк ясап җибәрде. Бөтенесен исәпкә алсаң, 200 кг тула. Бу хакта «Шәһри Чаллы» сайтында Гөлия Ибәтуллина яза.
«Махсус хәрби операция зонасына барысы 200 кг чәкчәк пешереп озаттык. Без – берничә битараф булмаган ханым белән «Мәдинә һәм аның командасы» дип исемләнгән түгәрәк оештырдык та, кичләрен чәкчәк пешерәбез. Һәм, беләсезме, бер кеше дә авырсынмый, киресенчә, барысы да бик теләп бу эшкә алына. Барысы да хәрбиләр өчен, барысы да Җиңү өчен! Боларны тыныч кына да сөйли алмыйм – тамагыма төер тыгыла, ирексездән елыйсы килә… Шәһәрдә битараф булмаган, хәрбиләр өчен янып торган кешеләрнең күп булуы сөендерә. Без чәкчәк пешергәндә дә изге теләкләр әйтә-әйтә, тизрәк тынычлык урнашсын, ир-егетләребез исән-сау әйләнеп кайтсын дип теләп эшлибез», – ди Мәдинә Якубовна.