Быел Татарстанда урман янгыннары булмаган
Быел 15 апрельдән 10 октябрьгә кадәр урманнарда янгын куркынычы чоры игълан ителгән иде.
(Казан, 15 октябрь, "Татар-информ"). Татарстан Урман хуҗалыгы министрлыгында 2019 елда Татарстан Республикасы урманнарында янгын куркынычы булган чорга йомгак ясадылар. Республикада урман янгыннары булмаган. Бу турыда министрлыкның матбугат хезмәте хәбәр итте.
Быел урманнарда янгын куркынычы чоры 15 апрельдән 10 октябрьгә кадәр булды. Бу вакытта башка категория җирләрендә 354,7 га мәйданда 663 янгын очрагы теркәлгән. Инспекторларның, урманчыларның һәм муниципаль районнарның башкарма хакимияте органнарының җайга салынган эше нәтиҗәсендә Татарстанда урман янгыннары барлыкка килүгә юл куелмады.
2019 ел башыннан бирле республиканың дәүләт урман инспекторлары тарафыннан янгын куркынычсызлыгы таләпләрен бозуга юл куймау турында 1,3 мең кисәтү бирелгән. Шулай ук, урманнарда янгын куркынычсызлыгы кагыйдәләрен бозган өчен, 449,5 мең сумлык 58 карар чыгарылган, диелә хәбәрдә.