Быел Татарстанда синхрон йөзү буенча 24 спорт мастеры әзерләнгән
12-13 яшьлекләр чыгышы буенча Татарстан – Россия Федерациясендә лидер.
(Казан, 14 июль, “Татар-информ”, Гөлнар Гарифуллина). Быел Татарстанда синхрон йөзү буенча 24 спорт мастеры әзерләнгән. Бу хакта Казан IT-паркында – чемпионатның шәһәр матбугат үзәгендә РФ Дәүләт Думасы депутаты Ольга Павлова белдерде.
Ул үзенең синхрон йөзү буенча Татарстанда попечительләр советы әгъзасы булуын әйтте. “Быел Татарстан территориясендә 8 яңа бассейн ачыла. Республикада синхрон йөзү әле күптән түгел генә үсеш алуына карамастан, без инде быел 24 спорт мастеры әзерләдек”, - диде Думаның хезмәт, социаль сәясәт һәм ветераннар эшләре буенча комитет әгъзасы.
Ольга Павлова быел Казанның 180 нче гимназиясендә һәм 181 нче мәктәптә синхрон йөзү буенча секцияләр ачылганын билгеләп узды. “1 сентябрьдә “Касатка” мәктәбендә синхрон йөзү буенча секция ачылачак”, - диде. 12-13 яшьлек Татарстан спортчыларның “Краса Сибири”, “Волжская волна” кебек ярышларда җиңүен әйтте. Аның әйтүенчә, 12-13 яшьлекләр чыгышы буенча Татарстан – Россия Федерациясендә лидер.
Депутат сүзләренчә, синхрон йөзү буенча түгәрәкләрне Әлмәт, Түбән Камада да ачу ниятләнә.