Җәмгыять 24 май 2010 13:48

Быел поезд пассажирлары өчен яңа ташламалар гамәлгә кертелә

Шул ук вакытта узган елларда гамәлгә кертелгән ташламалар да сакланып калачак

Скопировать ссылку

(Казан, 24 май, “Татар-информ”). “Федераль пассажир компаниясе” ААҖ быел пассажирлар өчен яңа ташламалар тәкъдим итә. Шул ук вакытта узган елларда гамәлгә кертелгән ташламалар да сакланып калачак.
Агымдагы елның 1 июленнән Мәскәү-Санкт-Петербург һәм Санкт-Петербург -Мәскәү юнәлешләрендә шимбә көнне юлга чыгучы поездлардагы СВ, купе һәм “Люкс” класслы вагоннарга билетлар 20 процентлы ташлама белән сатыла. Мәскәү-Горький, Санкт-Петербург-Горький, Мәскәү-Әстерхан, Мәскәү-Саратов, Мәскәү-Новгород юнәлешләренә йөрүче поездларда СВ һәм купе вагоннарда, билетлар юлга кузгалырга 45-31 тәүлек алдан алынганда, 30 процентлы ташлама каралган. Билетлар поезд юлга кузгалырга 30-21 тәүлек алдан рәсмиләштерелсә, ул чакта бу төр вагоннарга 20 процентлы ташлама кулланыла.
Көз айларында тагын берничә махсус тариф гамәлгә керәчәк. Алар -“Гаилә ташламасы”, “Минитөркем” һ.б.
Һәр җәй кертелә торган традицион ташламаларга килгәндә, алар быел да гамәлдә булачак. Адлер, Сочи, Анапа, Новороссийски, Кисловодски, Минеральные Водыдан 1-20 июнь аралыгында юлга чыгучы поезларда СВ һәм купе вагоннарда, 14 августтан 31 августка кадәр Адлер, Сочи, Анапа, Новороссийски, Кисловодски, Минеральные Водыга юл алучы поездларда шундый ук вагоннарга, шулай ук 1 июньнән 30 сентябрьгә кадәр диңгез юнәлешенә йөрүче барлык өстәмә поездларга 20 процентлы ташлама саклана.

Сәхифәләр

Быел поезд пассажирлары өчен яңа ташламалар гамәлгә кертелә