Быел “Мисс Татарстан” конкурсы өчен костюмнарны әзерләү буенча рекорд куйганнар
Париждан дизайнер Владимир VQ конкурска киемнәрне тиз вакыт арасында тапшырган.
(Казан, 28 гыйнвар, “Татар-информ”, Зилә Мөбәрәкшина).“Мисс Татарстан – 2019” конкурсына киемнәрне бер ай алдан әзерләгәннәр. Коллекцияләрне булдыру буенча рекордны Париждан дизайнер Владимир VQ ясаган, ул костюмнарны 10 көн эчендә тегеп биргән. Бу хакта “Татар-информ”да үткән матбугат конференциясендә конкурс президенты Изольда Сахарова әйтте.
Владимир VQ Мәскәүдә туган, унбиш ел Парижда яши һәм иҗат итә. “Ул тукыларны Франциядән алып кайтты һәм тиз вакыт аралыгында “Мисс Татарстан - 2019” конкурсы өчен зур эш эшләде”, - дип билгеләп үтте Изольда Сахарова.
Шулай ук, конкурска Чабаксарда яшәүче дизайнер Екатерина Тонюшкина һәм Казан дизайнеры Солтан Салиев үзләренең киемнәрен әзерләгән. “Алар бары тик кыйммәтле материаллардан – бәрхеттән, ефәктән һәм йоннан гына текте”, - диде ул.