Быел Болгар ислам академиясе абитуриентлардан 240 гариза алган
Бүген югары уку йортында 115 студент белем ала.
(Казан, 6 октябрь, “Татар-информ”, Екатерина Фадеева). Быел Болгар ислам академиясе абитуриентлардан 240 гариза алган. Бу хакта “Татмедиа” АҖ генераль директоры Андрей Кузьминга “Татар-информ” агентлыгы өчен интервьюда академия президенты Камил Исхаков сөйләде.
“Гаризалар күбрәк иде, бер урынга якынча 2-3 кеше. Без имтиханнарны “4”ле һәм “5”ле гә бирүчеләрне генә кабул иттек”, - диде Исхаков.
Бу уку йортына үзләре теләп гариза бирүчеләр килә, аларга “комсомол юлламасы” яки Татарстан мөселманнары Диния нәзарәте юлламасы бирелми.
Исхаков сүзләренчә, хәзер академиядә 115 студент белем ала: беренче курста 58 кеше, икенче курста – 57.
Интервьюның тулы варианты sntat.ru сайтында чыгачак. Видеоверсияне “Татар-информ” агентлыгының ютуб каналында карарга мөмкин булачак.
Тамашачылар интервьюның телевизион версиясен “Андрей Кузьмин белән галстуксыз интервью” программасында “Татарстан 24” телеканалында шимбә һәм якшәмбе көннәрендә 18:30 сәгатьтә карый алачак.