Икътисад 15 декабрь 2019 16:24

Путин Россиянең тагын 19 төбәгендә үзмәшгульләр өчен салым кертте

Татарстан дүрт пилот төбәкнең берсе булды, алардан башлап илдә яңа салым режимы кертелә башлады.

Скопировать ссылку

(Казан, 15 декабрь, «Татар-информ»). Россия Президенты Владимир Путин илнең тагын 19 төбәгендә үзмәшгуль гражданнар өчен яңа салым режимын кертү буенча эксперимент гамәлен таратты.

Дәүләт башлыгы тарафыннан имзаланган тиешле үзгәрешләр кертү турындагы Федераль закон хокукый мәгълүмат рәсми интернет-порталында урнаштырылган.

Үзгәрешләр 2020 елның 1 гыйнварыннан үз көченә керә. Үзмәшгульләргә салым эксперименты Санкт-Петербургта, Воронеж, Волгоград, Ленинград, Түбән Новгород, Новосибирск, Омск, Ростов, Самара, Сахалин, Свердловск, Төмән һәм Чиләбе өлкәләрендә, Красноярск һәм Пермь крайларында, Ненец һәм Ямал-Ненец автоном округларында, Ханты-Манси автономияле округы – Юграда һәм Башкортстанда гамәлгә ашырыла башлый.

Татарстан Мәскәү, Мәскәү һәм Калуга өлкәләре белән беррәттән, яңа салым режимы кертелә башлаган дүрт пилот төбәкнең берсе булды. Декабрь башында республикада теркәлгән үзмәшгульләр саны 60 меңнән артып киткән.

Татарстан Президенты Рөстәм Миңнеханов фикеренчә, яңа салым режимына Россия Федерациясе төбәкләрендә ихтыяҗ булачак.

#үзмәшгуль #Салым

Сәхифәләр

Путин Россиянең тагын 19 төбәгендә үзмәшгульләр өчен салым кертте