Казанда 349 млн сумга Сәламәтлек саклау министрлыгы биналары комплексы төзеләчәк

Эшләрне 20 июньдә башларга, ә 2020 елның 31 декабренә тәмамларга планлаштыралар.

(Казан, 13 май, «Татар-информ», Марат Ишкилдин). Казанда Татарстан Сәламәтлек саклау министрлыгы өчен гомуми суммасы 349 млн сум булган биналар комплексы төзелә башлаячак. Тиешле мәгълүмат Дәүләт сатып алулары сайтында урнаштырылган.

«Төзелеш-монтаж һәм башка эшләргә, шул исәптән җиһазларны урнаштыруга һәм монтажлауга финанслау лимиты: 349 млн 250 мең 893 сум», – дип билгеләп үтелә тендер документларында.

Зур Урам урамы, 1а йорт адресы буенча урнашкан участокта мөмкинлекләре чикле кешеләргә керү уңайлыгы булган 46 машина кую урынына ике катлы парковка, биш катлы административ-тикшеренү бинасы һәм ике катлы ярдәмче бина барлыкка киләчәк.

Төзелеш республика бюджетыннан финансланачак.